Ikea

Dat Paradies mutt jichtenswo in Sweden liggen un dormit de annern tominnst ´n beten wat dorvun afkriegen, gifft dat Ikea. Dat fangt al bi’t Ringahn an: As Erstes kann’n sien Gören in Smoland, in’t Bällebad afgeven un mol richtig schöön twee Stünnen in Roh inkopen. Keen Quarkenbüdels mehr, de blarrn, Ies, Speeltüüch, na Huus oder allens op enmol wüllt. Denn geiht dat de Rolltrepp tohööchd, liek in’t Restaurant. Dor gifft dat Köttbullar, so nömen de bi Ikea un woll ok in Sweden Fleeschklüten. Man dat Beste is dat Drinken: Du kannst di ´n Glas för 1.30 € holen un so veel Kaffe, Saft oder Brause ut den Automaten sugen, as du willst. Herrlich! Nu aver af in’n Loden. Un dor is dat erst schöön! All de feinen Saken, de so utsehen, as harr se ´n fründliche Swede jüst för di maakt. Bi’t Rutgahn Kinner nich vergeten! Un komisch, wullst doch blots Teelichter un Servietten kopen un an’t Enn büst‘ 200 € in’t Paradies losworrn.