Sommerlock

Erst weer he dor, dat weer verkehrt, denn weer he op enmol weg, dat weer ok nich richtig un to’n Sluss is he twoors över Nacht wedder dor, man nu mutt sien Ministersch weg - de Deenstwagen. Klor: Wenn een vun Stüergeld en Auto betahlt kriegt, mutt een dormit ok vernünftig hanteren, un wenn’n dat nich deit, dorför ok Bescheed kriegen. As Ministersch is se ok en Vörbild. Man dat Sommerlock weer dütt Johr so groot, deep un hungerig, dat dorbinnen nich blots en ganze Ministersch tohoop mit ehr Panzerauto verswinnen kunn. Nee, ok noch de gewaltige Arger op de Bankers, de en poor Weken vörher Bargen vun Geld üm de Eck bröcht hebbt, is enfach weg. De Ersten von jem speelt al wedder Monopoly. Komisch egentlich, oder? Villicht is dat aver ok en beten enfacher, op so‘n Urlaubstörn na Spanien afgünstig to ween, as op‘n poor Milliarden, de in de Grütt gahn sünd. Dat ene kann een sik jo tominnst noch vörstellen dat annere nich.