Top(f)model

„Mantsche Mädschen schaffen es, mantsche nicht.“ Seggt Fru Klum över de Deerns in ehr Fernsehshow „Germanys next Topmodel“ un se mutt dat jo weten. De kennt sik ut mit allens, wat schön is. Un dat Beste is: se behölt dat nich blots för sik, nee, se geiht los un vertellt dat alle Welt, so dat de annern, wat jo Amatören sünd bi de Schönheit, ok noch wat vun all ehr Klookheit afkriegen. Sodennig is man as Tokieker vun de Show foorts duppelt beschenkt: Mit Schön- un Klookheit op enmol. Un mit beides sünd se dor nich klenlich. De annern Experten in de Jury-Runn sünd natürlich ok nich slecht. Ok bi de markst du glieks, de hebbt Ohnung. Man se sehen nich so goot ut as Fru Klum. Aver de gifft sik nu nich mehr dormit af, blots schön to ween. Nee, siet dat se „Seal“, enen engelschen Sänger, heiradt hett, kann se ok noch schön singen. Weer noch wat? Ach jo, Fru Klum sett sik ok noch annerwegens in, siet 2005 is se sogor „Markenbotschafterin“ för Mc Donalds. Annern maken dat man blots för Unicef. „Mantsche“ schaffen dat un wölken even nienich.